ليزيكلار نتاع لاسبيوشة

1. السلام عليكم ورحمة الله تعالى وبركاته
   تبارك الله مشاء الله
   ان شاء الله كامل تكونو ملاح
   عملت ليزيكلار نتاع لاسبيوشة مشاء الله جاو رووووعة حبيت نحط الطريقة للافادة كاين بزاااف طرق انا هدي هي طريقتي
   المقادير
   
   كاس حليب
   كاس فرينة
   2 حباة بيض على حسب الحجم ادا صغير 3 وديري منها النص برك
   80غ زبدة
   ملعقة كبيرة سكر +ملح
   طريقة التحضير
   في كسرونة على نار هادئة نحط الحليب ونضيفلو الملح والسكر ونواصل التحريك ونضيف الزبدة ونواصل التحريك وبعدها نضيف الفرينة ونحرك حتى تتلم وونحيها من النار ونضيفلها البيض ونحرك جيدا حتى تصبح عجينة شبه جارية .
   هنا الصور
   هنا حطيت الحليب مع السك والملح هنا اضفت الزبدة مع التحريك المتواصل
   
   
   هنا نضيف الفرينة كلها دفعة واحدة مع التحريك هنا راهي بدات تتلم العجينة وونواصل التحريك
   
   هنا العجينة راهي تلمت مليح ننزعها من النار و نضيفلها البيض
   
   هنا راهي واجدة لازم تخرج هكدا ماهي جارية ماهي يابسة هنا راني خرجتها في لابش ادوي والي ماعنهاش تهز العجين بالمغرفة ودرلها خطوطو بالفرشيطة
   
   
   هنا خلاص طابو وخداو الون شوفو هنا كيفاش جات من الداخل خفيفة
   
   
   بعد مافتحتها عمرتها من الداخل بالشكولا وبدنات شكو
   
   
   
   
   
   
   
   ان شاء الله تعجبكم وكي العادة الي عجبتها تعطيني دعوة شاااااابة من قلبها